Um þessar mundir höldum við uppá 5 ára starfsafmæli Vinnuverndar ehf. Að því tilefni létum við útbúa nýjan bækling sem verið er að dreifa á helstu vinnustaði landsins. Erum við mjög ánægð með útkomuna !
Við fögnum þessum tímamótum og hlökkum til komandi ára.
- Starfsfólk Vinnuverndar
Dagana 5.-25. maí mun “Hjólað í vinnuna” fara fram.
Frá árinu 2003 hefur Íþrótta- og Ólympíusamband Íslands staðið myndarlega að því að efla hreyfingu og starfsanda á vinnustöðum með heilsu- og hvatningarátakinu “Hjólað í vinnuna”. Megin markmið átaksins er að vekja athygli á hjólreiðum sem heilsusamlegum, umhverfisvænum og hagkvæmum samgöngumáta.
Starfsmenn vinnustaða hér á landi hafa tekið vel við sér því þátttakan hefur margfaldast á þeim tíma sem verkefnið hefur farið fram.
Hjólað í vinnuna er gott tækifæri til að auka samheldni og heilbrigði starfsmanna og er því mikilvægt að virkja vinnufélagana í átakið. Til að gera keppnina enn skemmtilegri er tilvalið að skora á aðrar deildir, vinnustaði, samkeppnisaðila og sveitarfélög í heilbrigða samkeppni.
Nú á dögunum birtist skemmtileg grein í veftímaritinu ynja.net þar sem fjallað var um nauðsynlega þætti til að lifa af kalda og dimma veturinn hér á Íslandi. Nú vitum við flest hvað þarf til að láta sér líða vel og fara vel með sig yfir vetrartímann en samt virðist það svo að við erum misdugleg að framkvæma!
Greinin Hvað þarf til að lifa af veturinn á Íslandi bendir á skemmtilegan hátt á hverjir þessir þættir eru og dregur upp jákvæða mynd af því sem hægt er að gera til að auka vellíðan á þessum tíma árs. Sundlaugarnar, hlýjir sokkar, hollur matur og kertaljós stuðla að betri vetri og vonum við að greinin hafi sömu áhrif á ykkur og hún gerði á okkur í hér Vinnuvernd.
Greinina er hægt að nálgast hér:
Vinnuvistfræðifélag Íslands (Vinnís) stendur fyrir málþingi þann 19. október nk. í Norræna húsinu á milli kl. 13 og 17 sem ber yfirskriftina “Skólinn – góður vinnustaður”. Markmið málþingsins er að fjalla um vinnuumhverfi grunnskólakennara frá ýmsum sjónarhornum.
Þar munu aðilar frá hinum ýmsu faggreinum koma fram og má þar nefna arkitekta, reynslusaga frá kennara, talmeinafræðingur sem fjallar um hljóðvist og iðjuþjálfa sem munu fjalla um niðurstöður á skólatöskudögum sem fóru fram nú í haust.
Nánari upplýsingar á www.vinnis.is
Málþingið mun verða frítt fyrir félaga í Vinnís, en mun kosta 1.000,- kr. fyrir aðra.l
Takið daginn frá.
Líkt og undanfarin misseri, er nú komið að fyrirlestraröð Rannsóknastofu í vinnuvernd.
Rannsóknastofan er þverfagleg rannsókna- og fræðslustofa. Henni er ætlað að vera víðtækur vettvangur rannsókna á sviði vinnuumhverfismála og atvinnulífs. Markmið rannsóknastofunnar er jafnframt að miðla vísindalegri þekkingu um atvinnulíf og vinnuvernd og laða fræðimenn til starfa á þessu sviði.
Hugtakið vinnuvernd vísar til samspils vinnuumhverfis, vinnuskipulags og stjórnunar annars vegar og aðbúnaðar, heilsu og líðanar starfsmanna hins vegar.
Fyrirlestarnir eru haldnir í Háskóla Íslands í stofu 201 í Odda og standa frá kl. 12:00-13:00 og er dagskráin sem eftirfarandi:
25. september
Tengsl vinnu og hjartasjúkdóma
Bolli Þorsteinsson, læknir hjá Hartavernd og sérfræðingur í innkirtlasjúkdómum
9. október
Vinna og vinnuumhverfi sjúkraliða á Landspítala
Alda Ásgeirsdóttir, starfsmannahjúkrunarfræðingur hjá Landspítalanum og
handhafi stúdentaverðlauna Vinnuvistfræðifélags Íslands - Vinnís árið 2009
23. október
Forvarnir vegna alheimsfaraldra
Þórólfur Guðnason, yfirlæknir sóttvarnasviðs hjá Landlæknisembættinu
Fyrirlestur er haldinn í tilefni Evrópska vinnuverndarvikunnar 2009 sem er að þessu sinni helguð áhættumati á vinnustöðum
6. nóvember
Úr veikindum í vinnu, samvinna um snemmbært inngrip
Ingibjörg Þórhallsdóttir, sérfræðingur hjá VIRK – starfsendurhæfingarsjóði
20. nóvember
Líðan þeirra sem misst hafa vinnu í kjölfar efnahagsþrenginga
Helena Jónsdóttir, MS. nemi í sálfræði og Guðbjörg Linda Rafnsdóttir, prófessor í félagsfræði og deildarforseti félags- og mannvísindadeilda
Allir velkomnir, aðgangur ókeypis.
Hin árlega styrktarganga Göngum saman verður haldin núna á sunnudaginn 6. september. Í ár verður gengið á alls 7 stöðum: Reykjavík, Ísafirði, Akureyri, Mývatnssveit, Egilsstöðum, Höfn og Vestmannaeyjum.
Göngum saman styrkir grunnrannsóknir á krabbameini í brjóstum. Starfsemi félagsins miðar að því að safna fé og efla styrktarsjóð félagsins til að taka þátt í því mikilvæga starfi að leita leiða til að skilja og hemja meinið. Göngum saman leggur áherslu á mikilvægi hreyfingar og heilsueflingar og aflar á þann hátt styrkja til félagsins.
Í Reykjavík verður gengið frá torginu við Árbæjarskóla og er göngugjald fyrir fullorðna kr. 3.000 sem rennur óskipt í styrktarstjóð Göngum saman. Frítt er fyrir börn. Lagt verður af stað kl. 9:30 fyrir þá sem hyggjast ganga 20 km og kl. 10:30 fyrir þá sem ganga 3, 7 eða 10 km. Nánari upplýsingar og skráning er á www.gongumsaman.is.
Gaman er að segja frá því að starfsmenn Vinnuverndar eru um þessar mundir að fara af stað með hreyfikeppni innan fyrirtækisins. Okkur finnst því tilvalið að hefja keppnina með því að sameinast í göngu næstkomandi sunnudag og styrkja þennan frábæra hóp – Göngum saman – og dugar ekkert minna en 10 km.
Sjáumst í Elliðaárdalnum á sunnudaginn!
Laugardaginn 22. ágúst næstkomandi verður Reykjarvíkurmaraþon Íslandsbanka haldið í 26. skiptið.
Eins og með alla hreyfingu er góður undurbúningur og þjálfun lykillinn að árangri.
Undanfarnar vikur hafa hlauparar sést æfa sig fyrir settan dag og er fólk jafnvel búið að vera að undirbúa sig í heilt ár, að keppast við að bæta tímann frá því árinu áður.
Borgarbúar ættu flestir að geta fundið hlaup við sitt hæfi því boðið er upp á 3 km skemmtiskokk, 10, 21 og 42 km hlaup og síðast en ekki síst Latabæjarhlaupið fyrir yngri kynslóðina.
Þeir sem taka þátt í Reykjarvíkurmaraþoni geta safnað áheitum fyrir góðgerðar – og líknarfélög og stutt við ýmis góð málefni.
Dagskráin hefst kl. 8 40 og munu þátttakendur vera ræstir út frá Lækjargötu. Eru allir hvattir til að mæta hvort sem heldur til að hlaupa eða hvetja hlauparana af stað.
Einelti á vinnustað er skilgreint sem tíðar og neikvæðar athafnir sem beitt er af einum eða fleiri einstaklingum gegn vinnufélaga. Þessar athafnir valda viðkomandi einstaklingi vanlíðan og grafa undan sjálfstrausti hans.
Sálfræðingar Vinnuverndar ehf. hafa mikla reynslu af úrlausnum og ráðgjöf vegna eineltis- og áreitismála sem upp kunna að koma á vinnustað. Hvert tilvik er metið sérstaklega og byggir vinnan bæði á ráðgjöf til stjórnenda, viðtölum við starfsmenn sem tengjast málinu auk fræðslu til annarra starfsmanna.
Þeim fyrirtækjum fjölgar stöðugt sem setja fram svokallaða eineltisáætlun. Eineltisáætlun er nokkurs konar viðbragðsáætlun sem segir til um hvernig bregðast skuli við einelti ef það kemur upp. Markmiðið er að innan vinnustaða sé stuðlað að forvörnum og aðgerðum gegn einelti. Þau fyrirtæki sem hafa slíka áætlun eru því betur undir það búin að takast á við eineltismál sem upp kunna að koma.
Árlegt Kvennahlaup Sjóvá og ÍSÍ fer fram þann 20. júní næstkomandi. Kvennahlaupið á merkisafmæli í ár en það er nú haldið í tuttugasta sinn. Að þessu sinni er hlaupið í samstarfi við Krabbameinsfélag Íslands.
Þema hlaupsins í ár er “Tökum þátt – Heilsunnar vegna” og er ætlað að vekja athygli á mikilvægi forvarna í heilbrigðu líferni auk þess að minna konur á mikilvægi reglulegra skoðana hjá Leitarstöð Krabbameinsfélagsins.
Markmið Kvennahlaupsins hefur frá upphafi verið að hvetja og styðja konur á öllum aldri til aukinnar hreyfingar og heilsueflingar, ekki aðeins þennan eina dag heldur flesta daga ársins.
Hjólað í vinnuna verður formlega ræst í dag, miðvikudaginn 6. maí, á Glerártorgi á Akureyri og í Húsdýragarðinum í Reykjavík.
Tilgangur verkefnisins er að ýta sem flestum af stað í reglulega hreyfingu og hvetja fólk til þess að taka upp heilsusamlegri og umhverfisvænni ferðamáta. Er meginmarkmið að hafa áhrif á ferðavenjur fólks.
Keppt er í 6 flokkum eftir fjölda starfsmanna á tímabilinu 6. – 26. maí. Mikill fjöldi fyrirtækja hefur nú þegar skráð sig til leiks.